Venus Unleashed

                   Mariana Unleashed Venus, Found Objects gemonteer in gebreekte glas pot,   2011

VENUS UNLEASHED

Dis die 24ste Desember en sy neem aan dis more Kersfees.    Daar’s liggies in die strate.   Daar’s liggies in die bome.   Daar’s liggies in die huise se vensters.   Net haar liggie is geblus.   Sy mis haar kinders wat gekies het om Kersfees by hul pa te wees,  haar vriende,  en sommer elke liewe ding waaraan sy kan dink.   Behalwe ‘n Kersboom, want ‘n kersboom het geskenke daaronder en sy het niemand om dit mee te deel nie..

Toe kry Lisa ‘n plan! Sy en haar hond gaan ‘n  kersboom hê.

So teen 7  het sy die dagbed in die tuin tot onder die boom gesleep, en dit met kussings bestrooi.   Sy druk kerse reg rondom die bed en knyp wasgoedpennetjies in die boom se takkies bo haar kop vas.  Soos ‘n kroontjie.   Toe haal sy ‘n hele sak bene  vir die hond uit, en vir haar,   2 snye witbrood, gerooster, kaas en tamatie met baie swart peper.   Sy gaan lê  op die bed en  luister na die feesvieringe in die lug.   En  dink.    Aan die onregverdige behandeling wat sy van die mense wat haar moet liefhê, ontvang.   Aan al die verwerping.   Aan haar  toekoms, haar finansiële situasie, en ‘n duisend ander goed.   

Sy besluit om vir elkeen ‘n kers uit te blaas.   En elke  keer as sy ‘n kers uitblaas, word dit donkerder om haar, en dan skuif die hond  ‘n bietjie nader.    Toe daar  een kers oor is, is Lisa net mooi by die een wat sy vir haar gewese man moet uitblaas.   Sy kan wragtig nie die lug oor haar lippe passeer nie.   Dis nie die teleurstelling en kwaad wat dit verhoed  nie, dis iets anders.   Dis iets anders.   “Dis my seksualiteit, ek gaan dit ook uitblaas,” besef sy met ‘n skok.

Sy kyk op.  Sy sien Venus en  onthou  skielik dat  vroue daarvandaan kom.

Toe Lisa dit uiteindelik regkry om die mankers uit te blaas, knipoog Venus vir haar.   En sy kon sweer daar's ‘n glimlag om haar mond.